salade

Salade, f. penac. Est une espece d'armure de fer pour la teste, descendant et couvrant la teste et le col de l'homme de guerre, jusques sur les espaules comme dit le Capitaine Diego de Salazar au second livre Del Tratado de re militari, Las quales armas, dit-il, eran una celada que le cubria hasta los ombros Ce qu'il appelle Celada, en cet endroit là, Vegece la nomme ores Galea, et ores Cassis, et estoit armure ou habillement de teste de l'homme de pied. Le mot vient de Silus Latin, qui signifie celuy qui a le nez rebouché et retourné contremont, à la semblance dequoy estant forgée la salade, pour retenir le coup rué sur la teste du soldat qu'il ne luy devalle sur le visage, tel habillement de teste pour la guerre a esté appelé salade. Sex. Pompeius Festus le dit en ces mots: Silus appellatur naso sursum versus repando, vnde galeae quoque a similitudine silae dicebantur. Et par cela est cogneu que l'Espagnol et autres nations le devroient escrire par s. comme nous. Mais la prononciation vicieuse de ceux qui premiers le tirerent du Latin, a gaigné tant que pour conformer l'escriture à leur mode de prononcer, ils l'escrivent et prononcent par c. Salade signifie aussi cette meslange de bonnes herbes froides et chaudes, trempée d'huile d'olif, et de vinaigre, avec du sel, qu'on sert et mange és entrées de table toutes parts, qui est un gracieux et plaisant mets. A cause de laquelle meslange Antoine de la Sale, a intitulé Salade le livre par luy addressé à Messire Jean d'Anjou Duc de Calabre, et de Lorraine, fils du Roy de Sicile, pource (dit-il) qu'en la salade se mettent plusieurs bonnes herbes, et aussi en ce livret j'ay mis une partie des bonnes et plaisantes choses que j'ay veuës et leuës. Mais la salade des anciens qui n'estoit que de diverses herbes seulement, à degeneré en corruptele de friandise, gloutonnie, et comme dict l'Espagnol en golosine, vice procedant d'Italie, car on la meslange de trenches de citrons, de saulcissots, espices, de capres, de raisins de Corinthe, et autres telles choses, si qu'elle ne sert plus pour rafreschir, et en moderée quantité comme nos ancestres en usoient, ains au plaisir de la langue et du palais de la bouche sans plus, et au detriment du corps, estant servie à bassins combles pour s'engorger. On appelle Salade aussi ores qu'il n'y ait qu'une espece d'herbe, comme, Salade de chicorée. Le nom semble estre prins du sel, ores qu'il n'y en entre que peu. L'Italien dit Salata, par t. qui est muete dure, et nous par sa moyenne d. Selon la reigle deduicte autre part en ces Commentaires. Le Languedoc dit Ensalade, laquelle preposition de syllabe l'Espagnol luy donne aussi, disant Enxiam, Quae dicas Salata, vel sale condita, Acetaria, Acetarium concisum sale adspersum, oliuae oleo acetoque inroratum.

Mettre une salade en sa teste, Galeare.

Thresor de la langue françoyse. Jean Nicot.